Prezident İlham Əliyevin Şuşa çıxışı nəqliyyat diplomatiyasının artan əhəmiyyətini bir daha nümayiş etdirdi
IV Şuşa Qlobal Media Forumunda Prezident İlham Əliyevin çıxışı yalnız Azərbaycanın cari xarici siyasət prioritetlərini deyil, həm də müasir beynəlxalq münasibətlər sistemində nəqliyyat diplomatiyasının getdikcə artan rolunu bir daha ön plana çıxardı. Dövlət başçısının səsləndirdiyi fikirlər göstərdi ki, XXI əsrdə nəqliyyat infrastrukturuna sahib olmaq artıq təkcə iqtisadi üstünlük deyil, eyni zamanda geosiyasi təsir imkanlarını müəyyən edən əsas amillərdən birinə çevrilib.
Son illərdə qlobal geosiyasi proseslər, beynəlxalq ticarət marşrutlarında yaranan risklər və regional münaqişələr dövlətləri alternativ nəqliyyat dəhlizlərinin formalaşdırılmasına daha çox diqqət yetirməyə sövq edir. Məhz belə bir şəraitdə Azərbaycan Şərq-Qərb və Şimal-Cənub nəqliyyat dəhlizlərinin kəsişməsində yerləşən etibarlı tərəfdaş kimi strateji əhəmiyyətini daha da artırır.
Prezident İlham Əliyev forum çərçivəsində çıxışında vurğuladı ki, Azərbaycanın son illər ərzində həyata keçirdiyi infrastruktur layihələri əvvəlcədən hesablanmış uzunmüddətli strategiyanın nəticəsidir. Ölkədə müasir avtomobil yollarının, dəmir yolu şəbəkəsinin, beynəlxalq hava limanlarının və Xəzər hövzəsinin ən iri ticarət limanlarından birinin yaradılması təsadüfi layihələr deyil, gələcək geoiqtisadi dəyişikliklər nəzərə alınaraq formalaşdırılmış inkişaf modelinin tərkib hissəsidir.
Dövlət başçısının diqqət çəkdiyi mühüm məqamlardan biri də ondan ibarət idi ki, nəqliyyat diplomatiyası yalnız fiziki infrastrukturla məhdudlaşmır. Effektiv tranzit sistemi qarşılıqlı etimad, regional əməkdaşlıq və qonşu dövlətlərlə sabit münasibətlər tələb edir. Azərbaycanın uzun illər ərzində apardığı balanslaşdırılmış xarici siyasət bu baxımdan ölkəyə mühüm üstünlük qazandırıb. Bu gün müxtəlif istiqamətlər üzrə həyata keçirilən yükdaşımaların davamlı şəkildə artması da məhz həmin etimad mühitinin nəticəsi kimi qiymətləndirilə bilər.
Çıxış zamanı beynəlxalq nəqliyyat marşrutlarına marağın son dövrdə əhəmiyyətli dərəcədə artdığı xüsusi vurğulandı. Yaxın Şərqdə və digər regionlarda baş verən hadisələr qlobal logistika sisteminin nə qədər həssas olduğunu nümayiş etdirir. Belə bir şəraitdə Azərbaycan üzərindən keçən marşrutların təhlükəsizliyi və etibarlılığı ölkəmizin beynəlxalq tərəfdaşlar üçün strateji əhəmiyyətini daha da artırır. Bu isə nəqliyyat diplomatiyasını xarici siyasətin mühüm alətlərindən birinə çevirir.
Forumda səslənən fikirlərdən aydın olur ki, Azərbaycan artıq sadəcə tranzit ölkə kimi çıxış etməyi deyil, regionda logistika siyasətinin formalaşmasına təsir göstərən aktorlardan biri olmağı hədəfləyir. Bakı Beynəlxalq Dəniz Ticarət Limanının genişləndirilməsi, gəmiqayırma imkanlarının artırılması və beynəlxalq daşımaların artan tələblərinə uyğun yeni infrastrukturun yaradılması bu strateji yanaşmanın mühüm elementləridir.
Bununla yanaşı, nəqliyyat diplomatiyası enerji siyasəti ilə də sıx şəkildə əlaqələndirilir. Azərbaycan uzun illər ərzində enerji layihələrində qazandığı tərəfdaşlıq modelini indi logistika və beynəlxalq daşımalar sahəsində də tətbiq edir. Bu yanaşma ölkənin geoiqtisadi mövqeyini möhkəmləndirməklə yanaşı, regional əməkdaşlığın dərinləşməsinə də töhfə verir.
Şuşa Qlobal Media Forumunda Prezident İlham Əliyevin səsləndirdiyi fikirlər göstərdi ki, müasir beynəlxalq münasibətlər sistemində nəqliyyat infrastrukturu artıq təkcə iqtisadi layihə deyil. O, dövlətlərin siyasi nüfuzunu, strateji etibarlılığını və regional təsir imkanlarını müəyyən edən əsas faktorlardan birinə çevrilib. Azərbaycanın bu istiqamətdə həyata keçirdiyi ardıcıl siyasət isə ölkənin qlobal nəqliyyat və logistika xəritəsində mövqeyinin daha da möhkəmlənməsinə xidmət edir.
Bəxtiyar Məmmədov
Qarabağxəbər.az informasiya portalının Belarus Respublikası üzrə xüsusi nümayəndəsi